Lou brave MoussùTibùrci, qu'èra óuficié de sanità, s'èra establit à...

E pi, pèrqué lou vous dirii ? que li a encara tanti gènt que l'an counouissut.

Que vous baste de saupre qu'èra un pichoun trau dei nouostri mountagna e que li menava una vida tranquila, lu malaut essènt rar e, couma diia l'autre, n'auguènt pas besoun dóu medecin pèr mouri.

Touta la siéu distracioun counsistia à faire de partida : de bòcha, l'estiéu, e de carta, l'ivèr.

Un cóu que faia frèi, MoussùTibùrci, emé lou juge, lou grèfié e l'esatour èron en trèn de faire lou cinq-cènt, quoura venguèt una fiheta que diguèt :

- Moussùlou medecin ! la frema de Jouanin, d'en Carrièra Soubrana, vous fa dire se voulès anar au siéu, pèr lou siéu ome qu'es malaut.

- Di-li que finissi la partida, e que li vau.

E coupèt, qu'èra au siéu tour.

Ma, la partida finida, si vouguèt faire la revenja e l'avion à pena encapada que, tourna-mai, la fiheta revenguèt: 
- Moussù! se vouliavas veni...

- Ma, que tron a, Jouanin ? 
- A mau à l'esquina. 
- A mau à l'esquina ? E bèn ! que si grate !

E, tranquilamen, repihèt li carta e countunièt la partida.

Jousé GIORDAN 
D'aquéli dóu calèn - 1926