| Paul Brodou (Francis Gag) |
|
La villa de Niça s'agrandisse, s'alarga cada jou un pau mai. Se fès tant de passà en un quartié doun eravas pas vengut despi trés més en darriè, li vous recounouissès plus. De caisselà de 14 plan si soun bastit doun li éra l'an d'avant un valounèu, un defici, un ouort, quatre marridi barraca. E, si duèrbon de carrièra nouvèli que, avés bèu vous frustà li cervèla, lou siéu noum vous resta pas en testa. D'autri fés arriba pi que, pèr una rasoun o pèr un'autra, si change lou noum de certèni carrièra. Arriba tamben que lu abitant d'un quartiè batèjon à la siéu moda un careiròu dubert en quauque luèc perdut. Es cen que acapitet un jou pèr lou tros de carrièra de 40 metre de lonc que, partent de l'avenguda Villermont, menava à la glèia Jeanne d'Arc. Pèr moudest que siguèsse, aquèu passage lou calia batejà, li dounà un noum, lou noum d'un ministre, d'un general, d'un pouèta, d'un escribachoun o d'un autre, ma un noum ! Lou malur es que, à la Meria degun s'en soucitava. E lu més, lu an passèron sènsa que jamai la decisioun siguèsse enfin pilhada. Un bèu jou, las d'asperà, lu abitant dau quartié de San Bertoumiéu si radunèron, discutèron e, finalamen, decidèron de dounà en aquesta carrièra lou noum de qu ? lou noum de Paul Brodou, lou chapacan, que, d'aquèu temp èra un persounage mai que mai poupulàri. E durant d'an e d'an, lou noum de Paul Brodou, marcat en letra de quatre pan sus d'una placa de màrmou, figuret à l'entrada e à la sourtida dòu careiròu. Despi, lou careiròu s'es alargat, es devengut carrièra e, dau còu, li an changiat lou noum. Doumage ! Carrièra Paul Brodou, pèr lu vièi nissart, aco fahia image, n'en parlava ! Cauria trovà la manièra de lou replaça en quauque luèc. Mi vèn un'idéa : touti aquéli autoumoubile que an lou malur de staciounà en "zona rougia" e que, en l'afaire d'un vira d'uès s'atrovon levàdi de pès, pariè couma un can sènsa mèstre pilhat dau chapacan, doun li mènon ? A la fourrièra municipala, n'es vèr ? A n'aquela fourrièra, vous sèmbla pas que lou noum de Paul Brodou li aneria propi ben ? Lu nissart pilherion vitou lou plèc : "Oh Fan d'un amoulet ! Ve que m'an levat la voitura ! E doun la vau cercà ?" "Da Paul Brodou !..." Francis GAG |