| Lou mounde d'ahura (Francis Gag) |
|
Lou mounde d'ahùra deven propi invivable ! Vous poudès plus proumenà en carrièra emb'una cartèla souta lou bras sènsa riscà de vous faire massacrà. Li banca, l'una après l'autra, soun atacadi. Cada nuèch, de boutiga soun desvalisadi, prouvisioun, viestit, cargat sus de camiouneta e voga ! Arriba meme que lu voulur, pressat, fàgon sautà lou cofre à la dinamita. E, pèr tant de bousin que si fague, jamai degun que augue vist o audit quaucaren ! e coura, d'asard, un d'aquèlu massacan es pessugat e passa davant lou tribunal, lu avoucat que lou defèndon vous souorton regulièramen lou meme rasounamen : "Lou miéu client, messiès, es un d'aquèlu paure diau qu'an jamai augut de chança !". O ben encara : "Escoutas, messiès, lou miéu client a fach una bestisa, es vèr, ma, noun l'aclapas, dounas-li la siéu chança !". La chança, toujou la chança ! Lu soulet à pas avè augut de chança soun lu paure mesquin que soun està raubat, sagatat, matrassat ! E pùra, se li pensas ben, es nourmal, vouoli dire que devion li s'asperà. L'argent tira lu voulur pariè couma lou mèu tira li mousca. En fin finala, n'arriban à counstatà que, selon qu lu emplèga, lu mot an pas dau tout lou meme sens. D'un temp, aco si dihia, ma pèr s'en rire. Pèr isèmple, à prepau d'aquèla coubla de Ribassièrenc, l'ome e la frèma, un pau simplàri, un pau touplen meme, que lou siéu enfant, una crapula finida, èra estat coundanat à mouort. Un bèu matin, lu doui vièi si véhon arribà lou campiè : "Vous vèni infourmà que lou President de la Répùblica a graciat lou vouostr' enfant." "Lou President de la Répùblica s'es fach amic eme lou nouostr' enfant ? diguè lou bouon vièi." "Vées ! afourtissè la siéu frèma, avian toujou pensat qu'un jou aquèu pichoun n'en faria ounour !" Cadun, lou v'ai dich, vè li cauva à la siéu moda... Francis GAG * Le titre initial est le suivant : "Comme quoi, à en croire Francis GAG, avoir de l'argent sur soi constitue une intolérable provocation..." |