Se siès d'aquelu que li plas de viagià en camin de ferre, aurès plesi à emparà que, d'aqui pau, (...) si pourrà anà de Nissa à Paris en men de set oura.Vous rendès conte !

Quoura pensas que, au coumençamen, lu diret, lu rapide, li metion très cóu mai e lu omnibus élu, s'estirassavon per camin duran 36 oura. A coustà de la Courrièra à cavau, èra ja una bella ecounoumia de temp, mi dirès, ma li gent soun està lonc à li si faire.

E, coura an coumençat à parlà de basti lou camin de ferre, de pertuà li mountagna pèr li faire passà lou tren, cadun dihia la sieua. Qu anounçava que aquèu fracas faria virà lou lach de li vaca. Qu predicàva que li galina espaventadi farion plus d'òu e que lu agnèu mouorerion en lou ventre dai féa. Qu si declarava segur que lou fum empouisouneria lou gran de turc, li souca, e douneria la maladia ai tantifla. Qu afirmava que aquela vitessa de 70 km à l'oura, taieria lou respir dai imprudent que metérion la tèsta à la pourtièra e que, de touta manièra, s'èron encara en vida, à l'entrada d'una galeria, li atroverion enfumegat, mouort, asfissiat à la sourtida !

E ren n'es arribat de tout acò. E, deman, coura lou dissata au sèra si traterà de s'embarcà en la fuàda pèr anà (...) en la luna, veirès lu estrabot que si sourterà. E pi li si faran, o puto li vous farès. Iéu, en la luna, li siéu tout l'an. Aloura !

Francis GAG 
la minute de Francis Gag, "Azur contact" - 3/9 décembre 1975 (extraits)

* Le titre n'est pas de l'auteur.