Lou bouòn prèire doun Soulina,
Qu'es curat à Cantaroun
Dau decan de l'Escarèna
A recut envidacioun
Pèr lou gran past de la Counfirmacioun !
Tant pèr si rempli la pansa
Que pèr plase à Mounsignour,
Ai bouoi vin, à li pitança,
Mourre-lèc, a sauput faire ounour.
Mà, tanbèn, l'oura s'avança :
Au vilage, cau faire retour !
Denant lu siéu uès que brihon,
Tourna-mai passon lu plat :
Li raiòla que resquihon,
Lou civié tant perfumat.
Lou gros poulas que l'evesque a coupat,
Li primour que tant n'agrèa
De s'en faire un plèn gamoun,
Pi, la tourta qu'es de blèa,
Pèr respet de li tradicioun,
M'au champagne que petèa
E fa crèisse l'alègre remoun.
Pènsa, entant que s'esperleca,
A li siéu soupa d'aiet,
A la merlussa tròu sèca,
Au couòs d'aiga pèr la set !
De vin, n'en bèu qu'à la messa e qu'un dèt !
Ah ! se d'una grossa cura
Auguèsse un jour lou proufit,
La sèrventa, pas madura,
Li tendria lou taulié garnit
D'antipast, de counfitura
'Mé de doba e de bouòi roustit !
Mà qu saup s'es la civada,
O l'estable, o'n repoumpèu ?
Denant la glèia arribada,
La mulèta, aqui, tant lèu,
Ti manda 'n l'aria un gran còu de rastèu ;
E, m'au crep que si devina,
Chavirat couma'n gros fai,
Nouòstre brave doun Soulina,
Au mitan dei siéu plus bèi pantai,
Pica'n terra de l'esquina,
Sènsa màncou poudé dire : Ai !
Courron, courron li vesini,
Courron tou lu parrouquian !
Tra, ta ta tra, ta ta tra, ta ta tra !
Ah ! bèu Dièu ! Cèn que arriba !
L'ausson, li cascon la giba !
Mà, èu di, remerciant :
Bouòni frèma, sias bèn bravi :
Tantoutun, mi calavi !
Louis GENARI
Lou Cairèu, année 1934, p. 26-28
